Padang — Hujaaan…. Bilo lah hujan, hati den cameh…. Mantun lagu lamo tun dipalesetkan urang awak kini. Kalau hujan lah tibo, darah lah badabok-dabok, lai ndak katibo lo galodo gadang liak ko.
Tu mah sahari Kamih kapatang (25/2) urang nan tingga di Kecamatan Koto Tangah, Kuranji, Pauah sarato Nanggalo di Kota Padang, lah cameh di ueknyo kutiko si panjang tungkai tu mulai manitiak siang hari. Tapi ruponyo iyo, dek sangai labek dan bakataruihan, mako Sungai Batang Kuranji pun mangamuak lo liak. Daerah Batu Busuk, Kecamatan Pauh banjir lo baliak.
Banjirnyo memang ndak sagadang tanggal 25 November 2025 nan marusak cukuik banyak rumah jo sawah ladang. Tapi banjir ko maundang trauma bagi masyarakai di sinan, sahingga nan lah pulang mangungsi, kini mangungsi lo liak, takuik kok tibo lo galodo gadang.
Daerah ko alun aman sapanuahnyo, tapi alah kanai banjir susulan lo baliak. Bahkan akses jalan nan baru diperbaiki kiro-kiro sapakan nan lapeh lah rusak, sahinggo urang-urang susah untuak bapindah.
Gubernur Sumbar Mahyeldi Ansharullah katiko mandanga lah tibo lo banjir di Pauah ko langsuang pai mamareso lokasi banjir susulan di Batu Busak tu, (12/25/2025)
Maingek intensitas hujan masih tinggi dan pengerukan sungai alun bisa dilakukan sacaro optimal, gubernur maimbau warga untuak samantaro maevakuasi ka tampek nan labiah aman untuak maminimalikan resiko.
“Maingek curah hujan masih tinggi dan kami alun bisa malakukan pengerukan sungai sacaro optimal, kami mamintak masyarakaik untuak pindah samantaro ka tampek nan labiah aman. Insya Allah sadonyo akan dipersiapkan,” kato Mahyeldi.
Inyiak Datuak Marajo ntun manyabuik baso banjir ko indak anyo tajadi di Batu Busuak sajo tapi kajadian sarupo juo tajadi di daerah Parak Villa, Jorong Pasa Maninjau, Kecamatan Tanjung Raya, Kabupaten Agam.
Kini ko, patugeh basamo basamo jo relawan sarupo PMI, jo Tagana, tantara, pulisi, sarato masyarakaik masih manangani kaadaan darurat di lokasi nan kanai, tamasuak mambagikan bantuan kapado panduduak nan kanai musibah.
“Kami mamintak masyarakaik tatap waspada jo ikuik arahan petugas di lapangan, karano cuaca ekstrim ko masih bapotensi tajadi di nagari awak ko,” kecek nyo.
Di daerah-daerah nan dihondoh tu, kini nan paralu bana adolah program pambarasiahan. Mambarasiahan rumah-rumah masyarakaik nan masih layak huni, supayo jan balamo-lamo bana di pengungsian.
“Tambah lamo mereka di pengungsian, batambah banyak lo pinyakik. Jadi rumah-rumah mereka nan masih tatimbun jo lunau sarato batu-batu, paralu sugiro dibantu mambarasiahannyo,” kato Ketua Palang Merah Indonesia Sumatera Barat, Aristo Munandar.
PMI, katonyo, salain manurunkan 14 tangki aia untuk mendistribusikan aia barasasiah, juo berencana menurunkan tim relawannyo untuk bakarajo manolong mambarasiahan rumah-rumah panaduduak nan tatimbun. (tan parpatiah)
