Padang — Antah sia nan mamulai gagasan nak menguduang jambatan kareta buatan Ulando di Lembah Anai, sahinggo seolah-olah Pamarentah Sumatera Barat nan bakandak nak mangudung jambatan basejarah ntun.
“Sia lo nan mangecekan Pemprov Sumbar ka mambongka jambatan tu? Ndak ado gai tu doh. Kito Pemprov basamo masyarakaik Sumatera Barat malah berketetapan hati untuk manjago jo mamaliharo jambatan kareta api di Lambah Anai tu,” kecek Nyiak Datuak Marajo, Gubernur Sumatera Barat.
Pernyataan tu disampaikan dek Gubernur karano babarapo hari sasudah galodo datang mahondoh Lembah Anai banyak bermunculan di medsos isu baraso Jambatan ko kadikuduang lantaran manggaduah kalancaran lalu-lintas oto. Sadangkan karete nyo lah lamo sangaik ndak lalu di sinan.
“Pemerintah Provinsi Sumbar bakomitmen untuak mamaliharo, malestarikan jo bausaso baa maaktifkan baliak rute kareta api ko sabagai bagian dari aset warisan sejarah jo budayo daerah,” keceknyo Gubernur katiko manarimo Komunitas Heritage nan mambahas pamaliharoan situs-situs bersejarah di Sumbar, hari Salasa patang ko di Padang.
Mahyeldi mangaku baso inyo takajuik jo batebanyo kaba isu paruntuahan jalur kareta api Lambah Anai “Ambo takajuik mandanga, karano masalah ko timbua tanpa pangatahuan gubernur. Padohal kabijakan nan kito jalankan alah jaleh, yaitu manjago jo malestarikan aset sejarah,” katonyo.
Tapi baa jo surek dari salah satu Direktorat Jenderal dalam Kementerian Perhubungan nan sadang beredar? Mahyeldi manilai ado kasalahan komunikasi karano surek tu ditanggapi tanpa koordinasi sabalunnyo jo Pemprov Sumbar.
“Manuruik ambo, ado kesalahan dalam proses komunikasi. Surek tu dijawek tanpa bakoordinasi jo kami di Pemda, padohal iko manyangkuik aset bersejarah,” jalehnyo.
Sabalunnyo Pemprov Sumbar alah basobok jo Mantari Kabudayaan Indonesia Fadli Zon sarato Mantari Perhubungan. Pado rapek tu disepakati baso indak ado pambongkaran jalur kareta api, tapi labiah kapado kajian nan komprehensif akan dilakukan untuak mamastian kalastarian jo panggunoannyo di maso datang.
“Sabagai aset warisan, jalur kareta api ko punyo nilai sejarah jo pendidikan nan tinggi. Kito harus marawatnyo dan mamakainyo, bukan mambongkarnyo,” katonyo. Baa pandapek para aktivis heritage? Arsitek jo aktivis pelestarian Warisan Padang, Yulsi Munir, manyambuik elok sikap tegas Gubernur ko. Inyo “Kami baharok pamarintah dapek sacaro langsuang maambiak langkah-langkah konkret untuak mamaliharo jalur jo bagian-bagian rel kareta api nan dianggap samakin bakurang dari wakatu ka wakatu, sarato malakukan studi teknis tantang parubahan struktur sajumlah jambatan di kawasan warisan budayo,” katonyo.
