Heran lo wak, pamarentah pusek alah maraso sangaik sulik na untuak managakkan paraturan nan mambatasi iklan rokok. Samantaro di Padang Panjang, kutiko Walikotanyo masih Engku Suir Syam barani mangaluaan aturan malarang iklan rokok di Sarambi Makkah tu, ndak ado heboh-heboh doh.
Sarupo itulah hebohnyo tantang rencana mambatasi iklan jo mambatasi distribusi rokok sahinggo 15 tahun nan lapeh salamo tigo hari baturuik-turuik di Harian Kompas, 22-24 Februari 2010, Aliansi Masyarakaik Timbakau Indonesia mamuek reklame atau advertensi bawarna satangah halaman. Tagline iklan tu adolah: ‘Giliran Kami Mangecek’.
Aratinyo komunitas rokok nan tadiri dari pengusaha pabrik rokok, petani rokok jo buruh industri rokok, mamintak ka Mantari Kesehatan nan katiko tu sadang manyiapkan rencana untuak mambatasi marokok, untuak mamikiakan baliak niaiknyo. Disabuik dek mereka baso jutaan buruh pabirik rokok jo petani timbakau jo cangkeh ka manganggur. Sudah tu ditambah pulo pasan nan manakuikkan bahaso Rp55 triliun cukai timbakau ka ilang dari kacio negara satiok tahun.
Bagi kami urang surek kaba, iko menarik karano iklan tu dimuek di Surek kaba Kompas, nan alah salamo ko dikenal kareh manulak iklan rokok. Salamo ko, kalaupun iklan perusahaan rokok sampai ka Kompas, harus jo syarat indak ado kato rokok, gambar rokok, kotak rokok, apolai urang marokok. Jadi iklan Marllboro nan pernah ‘sukses’ di Kompas tu tapaso hanyo barisi gambar kudo-kudo sajo. Indak ado pasan-pasan tantang rokok atau timbakau.
Tapi, walau indak langsuang iklan rokok, jo iklan tigo hari baturuik-turuik barupo pasan dari pambuek rokok, awak heran juo. Apo nan salah jo Kompas? Mudah-mudahan iko hanyo pilihan untuak maagiah kesempatan ka satu pihak pado saat duo pandapek sadang basaiang di publik.
Baliak ka parang marokok. Usaho untuak mencegah bahayo marokok dari manyebar sabananyo harus dimulai dari bawah. Contohnyo sarupo nan dibuek dek Pemko Padang Panjang, Pemprov DKI, Pemko Surabaya dan babarapo wilayah Kabupaten/Kota lainnyo.
Kalau pamarintah di tingkek bawah alah sapakaik nak mambuek peraturan daerah nan sarupo, lamo jo lambek tantu akan mambuek peraturan nan paliang tinggi barupo undang-undang indak paralu repot lai.
Karano itu, nan paralu juo (dan paliang pantiang) adolah baa caronyo urang cadiak pandai di pamarentahan maambiak kato sapakaik tantang bahayo timbakau. Lah jaleh kama se dipareso labornyo, timbakau ko manganduang nikotin dan nikotin adolah zat nan babahayo. Jadi kini baa pulo para pemimpin daerah/DPRD sadonyo bisa sapakaik: bahaso marokok tu babahayo! Dan itu harus tanpa reserve.
Konsekuensi dari mupakaik bahaso marokok tu babahayo untuak kesehatan jo ekonomi adolah integritas. Baa kok malu bana mangaku marokok tu babahayo tapi indak namuah malawannyo. Jo caro iko, lahialah usaho-usaho hukum ko, tiok daerah mambuek paraturan daerah, untuak mangurangi daerah marokok. Kalau lah sampik tampek manduduik paisok ntun tantu lamo jo lambek, maleh juo urang mambali rokok.
Sampai kini, alun ado usaho nan nampak ka arah itu sacaro agresif sarupo awak malawan narkoba jo korupsi. Kampanye anti marokok paralu digalakan. Di Malaysia, Singapura atau Thailand samakin jaleh sumangaik anti marokok tu.
Sabagai mantan perokok nan kini manjadi perokok pasif (kadang-kadang marokok, kadang-kadang indak) ambo dapek marasokan baa bana tersiksanyo para ‘ahli hisap’ (istilah ambo untuak perokok) katiko pai ka nagari nan indak menghormati perokok. Di Bandara KLIA, rokok hanyo ‘ditahan’ di tampek-tampek tatantu sajo. Di terminal Pudu Raya Kuala Lumpur, sabagai ‘ahli marokok’ awak harus sungguah-sungguah batobat dari kecanduan nikotin.
Maklum di sinan, ‘ahli hisap’ tu disaman (didando) dek polisi wisata.
Di terminal Pudu Raya tu, ndak buliah marokok di tingkek (lantai) apopun kacuali di ruang bawah tanah tampek bus-bus diparkir. Kalau sekedar parkir se oto tu ndak baa doh, ko nyo parkir dengan masih iduik, asok knalpot nyo mangkapopoh mamanuhi ruangan bawah tanah tu.
Jadi kecek polisi wisata Malaysia tu ka ahli hisap nan tatangkok tangan: “Tolonglah Ncik, kalau nak merokok sila ke besmen.” Mako pupuahlah rokok tu bacampua jo asok knalpot nan mahitam.
Ruang tabukak di Thailand pun ndak nampak illan rokok di sinan doh. Nan ado adolah larangan marokok samakain banyak. Di Hatyai, kota wisata selatan Thailand mulai managah marokok lo. Di hotel, marokok hanyo buliah di kamar. Di lobi, kalau taragak nak dapek ‘uang rokok’, alias dando 2000 Baht (sataraf jo 200 ringgit Malaysia), tolong iduikkan rokok sabatang.
Parang malawan marokok samakin parah di Thailand. Rokok merek Mildseven ko buatan Japang di Thailand, haragonyo sakitar Bt140 atau Rp60 ribu. Khusus untuak nan didistribusikan di Thailand, bagian lua kemasan Mildseven indak hanyo mancakup paringatan tatulih tantang bahayo rokok jo teks, tapi juo barisi gambar jantuang manusia jo bagian-bagian tubuah manusia nan rusak dek nikotin.
Kini tingga di awak sajo, apokah awak nio malawan godaan rokok atau indak dan baranti jadi ahli hisap?
Mengenai sikap awak katiko mandanga ‘ratok’ masyarakat tembakau nan mangatokan bahaso petani tembakau akan kahilangan penghasilan, sabananyo paralu awak maetong baliak. Bara bana karusakan nan ditimbulkan baiak untuak kesehatan maupun ekonomi dek marokok dibandiangkan jo bara gadang kontribusi rokok untuak kebaikan nasional.
