Lah ampia lo sabulan oto dari Padang ka Padang Panjang atau sabaliaknyo ndak bisa lalu di Aia Mancua Lembah Anai dek jalan nasional nan baru dipelok satahun nan lapeh tu kini putuih lo liak.
Jalan tu taban dihondoh galodo minggu pangabisan bulan November nan lapeh. Badan jalan sapanjang 300 meter luluih dibaok aia gadang, jan ka oto lai, onda sajo ndak bisa lalu doh.
Mako sasudah galodo gadang mahondoh Sumbar, Sumut jo Aceh dek hujan nan co dicorohkan dari langsik salamo sapakan, patugeh dari Kantua PU Sumatera Barat bakarajo kareh memelok jalan nan taban tu. Masyarakat nan dari Padang ka Pikumbuh atau nan dari Batusangka ka pai naiak kapatabang, tapaso lalu ka Solok, ka Sitinjau Lauik.
“Duo baleh jam ambo dari Pikumbuh ka mari,” kecek Noverman (44) nan tingga di Siteba Padang tapi baru pulang dari manyilau dunsanaknyo di Pakanbaru tanggal 5 Desember.
Jalan dari Solok sampai ka Indaruang Padang sabana basasak. Oto jo onda basilingkik. Pulisi jo Dinas Perhubungan paniang dibueknyo. Maklum urang-urang nan mambao oto tu ado nan stress bagai dek lamo bana antri.
“Insya Allah, tanggal 16 ko wak cubo bukak jalur Lembah Anai baliak, tapi samantaro untuak oto ketek sajo, roda ampek, indak buliah oto-oto gadang doh, jalannyo masih darurat,” kecek Kapolda Sumatera Barat, Irjenpol Gatot Suryanta, hari Salasa kapatang ka wartawan.
Kecek liau, uji coba jalan Lembah Anai ko sapakan sajo. Tapi ndak 24 jam doh. Jalan ko dibukak untuk oto ngenek-ngenek dari pukua ampek patang sampai pukua 9 pagi bisuaknyo. Jadi kalau siang hari, ditutuik karano urang ka bakarajo manyalasaikan mampaelok jalan tu.
Salamo maso uji coba ko, oto nan buliah lalu di situ, oto roda ampek, jo onda. Tapi oto gadang nan buliah lalu hanyo oto nan mambaok minyak (BBM) sarato angkutan nan mambaok material proyek mampaelok jalan tu sajo.
Kapolda mamintak ka masyarakat nan ka mamakai jalan ko supayo hati-hati. Dimintak basaba, patuah ka aturan. Ndak buliah asa manyorong sajo, manyalip ndak bakatantuan, sahingga mambuek lalu linteh jadi macet.
Di Sitinjau Lauik nan mambuek jalan tu macet total dek karano banyak supir nan ndak bataratik. Lah jaleh jalan macet, nyo manyarumbu juo mamotong di jalan nan kosong. Padahal itu jalan untuak urang dari arah nan balawanan. (tan parpatiah)
