Padang — “Oiiii…gampoooo…… ” mantun warga Agam mamakiak kutiko hari Akaik ko (28/12) oukua sambilan pagi gampo mahoyak nagari. Warga agak panik, maklum nagari ko sadang ditimpo musibah galodo gadang di Palembayan, Malalak, Balingka dan Manainjau.
Gampo nan baroyak pagi tu, kecek BMKG tanagonyo sekitar ampek koma anam magnitudo. Pusek gampo tu memang sekiar Agam atau 18 kilometer ka arah barat laut Agam. Kadalamannyo adolah 10 Km, jadi tamasuk gampo dangka sahinggo hoyaknyo agak kareh dirasokan masyarakaik.
Di Lubuk Basuang kabanyak banyak warga nan bahamburan capek kalua rumah, kutiko gampo tu taraso baroyak. “Ado duo kali hoyak, cameh wak pak.” kecek Syaiful, warga Lubuak Basuang. Inyo mananangkan keluarganyo nan sato panik dek duo kali gampo mahoyak tu.
Pajabek Badan Penanggulangan Bencana Daerah Agam (BPBD), Abdul Ghafur, sarupo nan dikutip dari kantua berita ANTARA manyabuikan baso alun ado laporan karusakan bangunan, rumah jo hal-hal lainnyo akibaik gampo nan baroyak duo kali tu. “BPBD kini sadang mangumpuakan data karusakan bangunan dari pamarintah nagari.namun Alhamdulillah lai ndak ado laporan karusakan bangunan tapi kami masih taruih bmangumpuakan data,” katonyo
Samantaro Kapalo Stasiun Geofisika Padang Panjang, Suaidi Ahadi manyabuikan gampo nan bakakuatan 4,7 magnitudo tu persisnyo bapusek di Kecamatan Bonjol, Kabupaten Pasaman. Jadi dek jauah dari lauik, sahinggo ndak bapotensi mandatangkan tsunami doh.
“Gampo tektonik 4,7 magnitudo nan tajadi pukua 09.11 WIB indak punyo potensi tsunaminyo doh,” kecek Suaidi Ahadi.
Hasia analisis BMKG manunjuakan baso gampo ko adolah gampo nan tamasuak kategori dangka dek aktivitas Sesar Kajai-Talamau.
Badasakan estimasi peta guncangan, gampo ko dirasoan dek masyarakaik di Kabupaten Pasaman, Kabupaten Pasaman Barat, Kota Bukiktinggi jo Kabupaten Agam. Indak itu sajo, guncangan gampo ko juo dirasoan dek panduduak di Kota Padang Panjang hinggo Kota Payakumbuh.
“Jadi masyarakaik sarancaknyo tanah sajo indak usah cameh bana, tapi nan waspada paralu satiok wakatu, tu namonyo sadar bencana,” kato Suaidi. (tan parpatiah/ant)
