Bukittinggi — Timpo batimpo musibah, sasudah banjir jo galodo, ditambah lo ja gampo. Di Maninjau galodo baulang lo liak, sahingga manimbun jalan gadang. Sajak Sabtu malam (27/12) ndak dapek oto lalu dari Lubuak Basuang ka Bukittinggi atau sakurangnyo malinteh dari Muko-muko ka Kelok Ampek Ampek.
Jalan provinsi nan mahubuangkan Kecamatan Lubuk Basung, Kabupaten Agam ka Bukiktinggi tasakang dek tanah jo batu sarato sarok-sarok nan dihondoh dek aia gadang nan lapeh dari batang aia Muaro Pisang, Nagari Maninjau, Kecamatan Tanjung Raya.
Aia gadang di batang aia ko dek karano saharian curah hujan nan cukuik labek malando kawasan itu, hari Sabtu (27/12) patang.
Kapalo Sat Lalu Lintas Polres Agam AKP Irawady manyabuikan, lunau, batu, kayu nan manutuik jalan provinsi tu mambuek kandaraan indak bisa lewat di daerah tu. Yo pak, baa lai, tatutuk jalan ko, basa dulu,” kato pulisi tu ka wartawan.
Mako pulisi mamintak seluruh warga nan mambao oto malintahi jalan tu, antaro Lubuak Basuang jo Bukiktinggi, tnda dulu perjalanan sampai jalanko dipaelok. Masyarakaik jo TNI/Polri satampaik bagotong royong mambarasiahan badan jalan nan lah saungguak tu. “Kami baharok ado alat berat nan mambantu dari Pemerintah Agam, sahinggo bisa salasai sacapeknyo,” kecel Irawady.
Sabalunnyo, batang aia tu juo nan malimpah manyababkan jalan takubua dalam lumpur jo bahan batu, hari Kamih (25/12) siang.
Agam adolah Kabupaten nan paliang parah dilando banjir jo galodo nan tajadi di Sumatera Barat sajak pakan pangabisan bulan November nan lapeh. Kabupaten jo kota lain nan kanai banjir jo galodo ko adolah Kota Padang, Kota Padang Panjang, Padang Pariaman, Pasaman Barat, Kabupaten Tanah Datar sarato Kota Solok jo Pesisir Selatan. Sahingga banyak rumah nan binaso, masyarakat nan selamat banyak kini tingga di pengungsian.
“Kini sadang diusahokan mambarasiahkan rumah nan masih layak huni, supayo warga nan punyo rumah tu ndak lamo bana di pengungsian, PMI ka manjalankan Program Bersih Rumah,” kecek Ketua PMI Sumatera Barat Aristo Munandar. (tan parpatiah)
