Padang — Bayia upah urang sabalun paluahnyo kariang. Mantun ajaran ugamo maajakan ke awak. Soal gadang ngeneknyo tantu sasuai jo kesanggupan urang nan manggaji sarato keikhlasan urang nan manarimo. Musibah tibo, upah dinaiakan, alhamdulillah.
Tapi dek pemerintah awak, upah urang bakarajo ko lai jadi paratian pulo gadang keteknyo, Di Sumatera Barat tahun nan katibo 2026, para pekerja agak bisa galak sengeng snek, karano Pamarintah Provinsi Sumbar alah sacaro rasmi manatapkan Upah Minimum Provinsi (UMP) 2026 manjadi Rp 3.182.955. Itu arati e naiak 6,3% atau Rp 188.761 dibandiangkan jo UMP taun nan lapeh Rp2.994.193.
Samantaro itu, Upah Minimum Sektoral Provinsi (UMSP) 2026 untuak duo sektor usaho juo ditetapkan manjadi Rp 3.214.846. UMP nan baru ko dinyatoan dalam SK Gubernur Sumbar Nomor 562-851-2025, sadangkan UMSP ditantuan malalui SK Gubernur Sumbar Nomor 562-853-2025.
“UMP Sumatera Barat sabalunnyo dalam kisaran Rp 2,9 juta. Untuak 2026 kami akan manambahnyo 6,3% jo mampatimbangkan inflasi jo patumbuahan ekonomi daerah, sahinggo jumlahnyo akan manjadi Rp 3,18 juta. Samantaro itu, kami alah manatapkan UMSP pado Rp 3,21 juta hari Salasa (12/23/2025),” kato Gubernur Mahyeldi.
Gubernur nan acok disapo jo ‘Buya Mahyeldi’ tu manjalehan baso katantuan UMP dikaluakan untuak Usaho Mikro jo Ketek (UMK), nan upahnyo sasuai jo katantuan undang-undang jo paraturan tapisah. Samantaro UMSP hanyo balaku untuak duo sektor usaho, yaitu sektor perkebunan sawit jo turunannyo, sarato sektor operasi pamasangan pasokan listrik.
Kapalo Dineh Tanago Karajo jo Transmigrasi (Nakertrans) Provinsi Sumatera Barat, Firdaus Firman manjalehan pakaro ini, katonyo, baso panantuan UMP jo UMSP 2026 adolah hasil diskusi nan intensif jo Dewan Upah Provinsi. Rapek partamo diadokan pado hari Jumaik (19/12/2025) dan rapek tindak lanjutnyo pado hari Sinayan pagi (22/12/2025). Kabijakan upah baru ko akan mulai balaku pado 1 Januari 2026.
“Kaputusan ko akan mulai balaku pado tanggal 1 Januari 2026,” kato Firdaus.
Rapek Dewan Upah ko dihadiri dek ssarikaik pekarajo, asosiasi induak samang (Apindo), rang cadiak pandai dari akademisi sarato jo unsur pamarentah. Di pertemuan ko, disepakati untuak manggunokan koefisien alfa 0,525 sabagai dasar untuak manantukan jumlah UMP jo UMSP Sumbar untuak tahun 2026.
