Padang — Urang banyak nan tingga di daerah-daerah nan dihondoh galodo kapatang ko, basiap-siap lah lai, sabab maso status tanggap darurat lah barakia lai mulai Sinayan patang (22/12). Pemerintah Provinsi Sumbar manyatokan mulai 23 Desember ko, sado daerah nan kanai galodo jo aia bah ko, mulai mamasuaki maso transisi manuju maso pamulihan.
Kecek Gubernur Mahyeldi Ansharullah, maso pamulihan ko ndak lo lamo-lamo na doh, paliang lambek 28 Deember. Salamo maso transisi tu Pemerintah Provinsi Sumbar mengampuangan data tantang karusakan jo karugian, sarato mangumbalikan palayanan dasar masyarakaik.
Layanan dasar ko antaro lain manyadiokan aia barasiah, sanitasi, layanan kasehatan, pandidikan, jo tampek palinduangan samantaro. Kasadoalahe tu dikarajokan sabalun masuk ka karajo rehabilitasi jo rekonstruksi total.
Kok yo bak nantun, lah dibarih makan paek tu mah. Sabab salamo ko soal mendata ko taruih se ndak bakalincikan. Data di Kabupaten kadang babeda lo jo data di Provinsi. Namun samantang pun baitu, gubernur yo tageh mamintak pajabaik-pajabaik nan batangguang jawek untuk pangumpuaan data tantang karusakan jo karugian nan diakibaikan dek musibah ko untuak dapek salasai paliang lambek 28 Desember 2025.
“Baa mangko paralu capek? Supayo kito bisa mamulai karajo rehabilitas jo rekonstruksi ko awal tahun 2026,” kato Buya Mahyeldi dalam rapek jo Wakia Gubernur Vasko Ruseimy basarato sagalo cdiak pandai nan baurusan jo bencana ko, I kantua bagonjong tu. Hadir lo dalam rapek tu Sekretaris Utamo BNPB Rustian sdang kan para Ngku Palo daerah (Bupati jo Walikota) hadir lo sacaro online.
Sungguah pun status tanggap darurat provinsi ko lah salasai, Buya Mahyeldi maingekan ka urang nan banyak baso kasalamatan umum tatap ka jadi prioritas utamo juo. Nyo kecekan lo, baso masyarakaik nan cameh sarato masih katakauikan atau caro bahaso tengginyo, trauma, mulailah manyadari bahwa iko hanyo ujian dari Allah. Na ma nan salamaik, kumbalilah bakarajo, bausaho sarupo nan taraalah. Kok sawah jo ladang nan lah hanyuik, mari samo-samo kita pelok baliak.
Tu baa kapado dunsanak-dunsanak nan lah banyak manolong salamo ko? Pakaro iko kato Gubernur, inyo ateh namo pamarentah Provinsi Sumatera Barat dan ateh namo masyarakat nan manjadi korban manyampaikan tarimokasih banyak, kapado sukarelawan, rang rantau, organisasi sosial, lembaga kamanusiaan jo masyarakaik banyak, nan lah capek kaki ringan tangan maagiah pertolongan darurat.
“Sadang awak sagalo senteang, datang pertolongan dari relawan nan ndak maetong jariah jo payah, lah turun bahu mambahu manolong dunsanak awak nan jadi korban, tarimokasih, Insya Allah kadibaleh Allah jo pahalo nan balipek gando,” kato Mahyeldi ka wartawan.
Satantangan karajo barek nan katibo yaitu rehab rekon, Mahyeldi mamintak sabaleh jo kapalo ka Bupati jo Walikota untuak mamastian data karugian di daerah masiang-masing sacapeknyo dikumpuan. “Sabab, jo data itulah awak memintak ka pamarentah pusek untuak mambangun baliak nagari wak ko,” katonyo.
Tu baa kok mandasak bana data tu? Nah, iko jaweknyo dari Sekretaris Utamo BNPB, Rustian. “Panyiapan rehab rekon ko sabana paralu sangaik, untuak mambaliakan kondisi sosial, ekonomi jo infrastruktur daerah nan punah rarah dek galodo ko. Data nan akurat jo valid adolah kunci utamo. Kalau datanyo takok-takok uwok tantu ndak tapek lo maetong anggarannya nantik.”
Samantaro soal mancari jo mengetahui korban nan lah basobok tapi ndak jaleh identitasnyo, Wakia Kapolda Sumbar Brigadir Jenderal Pol Solihin manyabuikan masih ado 28 mayik nan alun diidentifikasi dan sadang dalam proses pangujian labiah lanjuik di Jakarta. “Kami sadang bakarajo kareh mancari tahu identitas 28 mayik ko,” katonyo.
Dari 16 kabupaten jo kota nan kanai galodo ado tigo daerah nan masih mampapanjang status tanggap darurat daerahnyo, yaitu Kabupaten Agam, Kabupaten Pasaman Barat jo Kabupaten Tanah Datar.
Banjir nan kini ko yo sabana gadang, lun pernah nan saparah ko lai di Sumbar. Apolai jumlah korbannyo juo banyak, 260 urang mati, 72 urang hilang sadangkan nan 382 urang lainnyo luko-luko.
