Padang — Banjir, galodo, bancano di nagari awak nan lah tajadi kapatang ko menapek perhatian nan sungguha-sungguah dari nan cadiak-cadiak di perguruan tinggi. Ruponyo tigo perguruan tinggi, Universitas Indonesia (UI), Politeknik Negeri Padang (PNP), jo Universitas Diponegoro (Undip) Semarang lah turun mambuek analisa sarato jo kesimpulan dan saran tantang baa nan kaelok dimaso nan katibo.
Katigo peneliti dari tigo perguruan tinggi ntun lah basobok jo Gubernur Sumatera Barat, Mahyeldi Ansharullah, Rabaa kapatang ko di Padang.
Katigo kampus perguruan tinggi ko bak istilah kini nyo, berkolaborasi malakuan analisis, membuek bababagai catatan sasuai jo ilimu masiang-masiang sasudah memfokuskan penelitian mereka di wilayah Tanah Datar sarato Agam jo Padang tarutamo di sekitar danau Singkarak, nagari Malalo, Sumpu (Tanah Data), Palembayan, Malalak (Agam) sarato Kota Padang.
Tu apo hasianyo panilitian ko?
Dr. Adonis Muzani, mawakili katigo-tigo perguruan tinggi ntun manyabuikan baso Tim B UI maagiah catatan tentang paralunyo mampakuaik dan maamankan peralatan saringan aia barasiah, saringan untuak aia minum, sarana internet jo panel surya. Jadi kutiko sasudah galodo atau bancano tibo, masyarakaik tetap dapek aia barasiah, bisa berkomunikasi sarato ado tanago listrik untuki panarangan.
Sudah tu, ruponyo Tim B UI nan bakolaborasi jo PNP ko juo maagiah info dari hasia maninjau ka lapangan, baso bencana nan tibo di Malalo sekitarnyo karano ado nan ratak di ateh bukik. Ratak tu diisi panuah dek aia hujan nan bakapanjangan, sahinggo manjadi rangkah sudah tu malosoh turun mehondoh kampuang Malalo.
Di Malalo juo ado Cekdam atau bendungan ngenek, di Jorong Duo Koto nan gunonyo panampuang aia supayo jan langsuang mancoroh ka bawah. Tapi ruponyo cekdam ko sato dihondoh lo dek galodo nan mambuek punah rarah kampuang di bawahnyo.
“Hal-hal sarupo ikolah nan manjadi alasan baa mangko paralu bana diadokan rapek jo gubernur supayo temuan-temuan di lapangan bisa langsuang mandapek perhatian dalam rekonstruksi,” kato Adonis.
Tim peneliti di Malalo juo maagiah rekomendasi bahaso kantua Walinagari Guguak Malalo di tapi batang aia, sarancaknyo dipindahkan karano bisa sajo taancam dek galodo. Salain dari itu, posisi kantua Walinagari juo di bawah jalan.
Kecek Walinagari Guguak Malalo, Mulyadi, nyo maraso tabantu dek tim peneliti tigo perguruan tinggi ko karano di dalamnyo tamasuak ahli geologi sahinggo dapek apo nan diparalukan rekomendasinyo.
Gubernur Mahyeldi juo manyampaikan ka perwakilan dari katigo kampus tu bahwa baliau juo tarimokasi ateh usaho pemetaan geologi di Sumbar. Faktor ko katonyo, dianggap pantiang karano manjadi sumber kajadian-kajadian sarupo banjir jo galodo.
Sumatera Barat punyo babarapo patahan bumi sahinggo malalui kolaborasi jo perguruan tinggi ko diharokkan mereka bisa maagiah dukungan untuk baa merencanakan pembangunan di maso nan kadatang.
