Baa ko baebohkan bana tu Uncu, caito urang minang atau ughang padang tu. Iyo itu bana, nan kini jadi pangka ota, kok disabuik nyo raso indak paralu, kalau dinok-i iyo pulo yeh, cubo dianok-i jen dibaok diam apolai sambia takalok agak cacah ba jano itu patuiknyo nan tampak.
A nan manjadi pokok soal satantang urang minang jo urang padang itu, nyo tun tasabuik lah ajan, urang minang tu samo sen jo urang padang. Tautamo dek urang nan bukan asa dari minang, kok jawanyo, bataknyo, ambon bagainyo, manyabuik urang minang samo sen jo urang padang.
Sambia bagarah kadang kalau wak yang ditanyo jo kawan nan indak urang awak, bajawek cando sen, “bukan, aku bukan orang padang, tapi orang bukittinggi” kadang batambah lo stek sambia iduang takambang, “kau tahu kan Bung Hatta, dia itu dari Bukittinggi, orang bukittinggi, bukan orang padang, tapi kalau orang minang, itu betul”. Biasonyo dijawek dek kawan tadi “tak peduli lah aku, sama saja itu”.
Disiko lah sunguik paralu ditagangkan, mato dipiciangkan, gigi di garatokkan untuak manjalehkan. “coba aku tanya engkau satu, kau orang jakarta ya”. dijawek dek kawan anak jakarta iko “iya, memang kenapa”. kau orang sunda atau jawa”. Sunda kawan.
Nah, coitulah nan nampak, mangaku2 urang Jakarta, tapi nyo urang sunda indak betawi gai doh. Nan lazim pulo tadanga, anyo urang padang, tapi asa nieh, ba ktp padang, tapi bukan urang minang. Jadi coitulah iyo indak bisa disamokan sen urang minang jo orang padang itu ndeh tuan.
Paralu bana maamba-ambai topik iko, disinan lah pokoknyo, apo nan jadi mukasuik. manyabuik urang minang ado tanyo bajawek nan dimintanyo, dima nagari, apo suku, sia pangulu, mamak, kampuang jorongnya, nan balaku disinan adaik bapakai budaya nan bapacik. Basabuik urang padang nyo, indak ado akibaik nan janeh dipintakan, nan balaku dima tingga rt, rw bara, apo kelurahan, sia apak amaknyo.
Tapi, apo jono nan tajadi kini, manjadi urang minang atau urang padang, disabuik urang sunda atau urang banduang. Alah kabua kalabu takahko, satantang apo nan manjadi mukasuik dari panyabuikkan urang minang atau urang padang itu. Disinan latak adok, tatakrama, adaik budaya, filosofi nan mandasari, tasabuik urang minang tantu renah kurenah, dari tunjuak aja adok adaik minangkabau, kalau urang padang dari maa adok nyo ka mandasari nan manjadi sandi atau dasar filosofi ajaran tata hiduiknyo, karano padang bukan sistem budaya, samantaro minang itu barupo sistem budaya apolai alah talakek pulo salogan “adaik basandi syarak, syarak basandi kitabullah” , nan aratinyo urang minang baradaiknyo bakitabullahnyo subagai dasar dari adaiknyo tadi. Kalau urang padang, iyo indak jaleh kama tagaknyo, apo filosofi iduik yang dipakai, karano padang bukan sistem budaya, tapi anyo namo sebuah kota.
Jadih uncu, kadisabuik urang minang atau orang padang?
Banyuwangi,
23 Desember 2025
