Padang — Lai takana dek sanak pakaro guru SMA di Bunguih Taluak Kabuang Padang nan tatangkok baduo duo sasano jantan dalam kakuih?
Wakia Katua DPRD Provinsi Sumbar, Evi Yandri Rajo Budiman, mamintak Pemerintah Provinsi untuak mambarantian guru nan ndak sandereh tu.
“Usulkan dipecat sabagai PNS dan dicabuik profesinyo sabagai guru. karajo ntah natah se nan dipabueknyo, marusak namo guru jo dunia pendidikan nagari awak,” kato Rajo Budiman tabik raman raman, kutiko basobok jo wartawan di DPRD, kapatang ciek lai (17/12).
Keceknyo, parangai ko indak bisa ditarimo lai. Apolai, paja tu adolah surang guru nan patuik manjadi contoh dan maajakan budi baiak ka murik.
“Iko sabana paralu diagiah palajaran, ndak cukuik hanyo manonaktifkan status PNS. Jadi awak mahimbau Pemda supayo sugiro manjatuahkan sanksi barek,” kecek Evi ko.
Sakadar maingek baliak untuk dunsanak, mulo-mulo guru ndak sandereh ko lah mambuek badatak juo hati urang banyak nyo paanak jawi atau urang jantan nan bahubuangan seksual sasamo urang jantan.
Tumah babarapo hari nan lapeh tatangkok basah sadang bajadi bana baduo duo jo anak bujang tangguang di dalam kakuih musajik Bunguih hari Sinayan (15/12/2025). namo singkek paja ko SR unua 58 tahun. Nan surang lai bujang tangguang namo singkeknyo LO umua 18 tahun.
Pinyakik nan acok disabuik LGBT tu takahnyo sadang banyak di Ranah Minang ko. Ntah apo kolah sababnyo mangko banyak urang jantan katuju bana lo dek nyo mancaliak urang jantan, padahal banyak gadih jo jando gai.
“Urang gaek, niniak mamak musti awas dan jan sampai mampabiakan anak kamanakan sato lo LGBT tu, “ kecek Katua Lembaga Kerapatan Adat Alam Minangkabau (LKAAM) H Fauzi Bahar Datuak Sati maingekan masyarakat. (Tan Parpatiah)
