Batang Anai – Rumah sikola nan rusak binaso dek dihondoh galodo di Sumbar sasudah dicaliak tanmpeknyo masih rawan bencana, akan dipindahkan ka tampek nan aman. Pamarentah di tangah keterbatasannyo juo maminta para dermawan untuk dapek menyumbang membangunkan baliak rumah-rumah sikola nan lah hancua tu di tampek nan baru sarato labiah aman.
Staf Khusus Menteri Pendidikan Dasar untuak Manajemen jo Lembaga, Didik Suhardi, nan maninjau sikola-sikola nan binaso di Sumbar tu sajak duo hari kapatang, mangatokan baso rumah sikola nan indak dapek lai dipakai, tarutamo nan barado di daerah rawan, relokasi ka lokasi nan labiah aman.
“Untuak lembaga pendidikan sarupo Madrasah Tsanawiah di Kabupaten Solok nan rusak sapanuahnyo dan paralu dipindahkan, kami baharok dukungan dari donatur, tarutamo manganai panyadioan tanah. Samantaro itu, untuak sakolah-sakolah nan di bawah naungan Kementerian Pendidikan Dasar, kami taruih mampalajari dan malanjuikan proses mancari bantuan supayo anak-anak tetap bisa sikola,” keceknyo.
Kementerian Pendidikan Dasar alah manyiapkan kelas samantaro barupo tenda baraja. Sakurang-kurangnyo tigo unit tenda akan dikirim sabanta lai ka daerah nan parah.
“Insya Allah tenda-tenda tu sabanta lai dikirim dan paliang lambek bisuak tibo, supayo anak-anak tu bisa baliak baraja,” jaleh Didik.
Kementerian Pendidikan Dasar alah mambagikan babagai bantuak bantuan sajak ampek minggu nan lapeh untuak mandukuang pemulihan pelayanan pendidikan. Bantuan ko diagiah sacaro batahap dan disasuaikan jo jumlah murik nan kanai dan tingkek karusakan pado unit pandidikan.
“Bantuan nan kami bagikan cukuik baragam, mulai dari kit sikola, bungkusan makanan jo minuman sehat, alat tulis sikola, sampai tenda untuak kelas darurat. Salain itu, kami juo maagiah dukungan dalam bantuak voucher tunai untuak mambantu mambarasiahan bahan banjir nan tasiso di lingkungan sikola,” kecek Didik.
Plt Kapalo SDN 05 Batang Anai Padang Pariaman, Lisa Rifendi, malaporkan ka Staf Khusus Mantari tu, sikola nan dipimpinnyo mangalami rusak barek dek banjir jo tanah longsor.
“Pado hari Kamis, 27 November 2025, sikola kami kanai banjir jo tanah longsor. Wakatu itu aia alah ampia sampai ka atok, dan longsoran dari tabiang balakang malando gedung sikola. Akibaiknyo, tujuah kelas, ciek ruang kapalo sikola, ciek ruangan guru menderita homogea kini. Nan tingga hanyolah bangunan perpustakaan, walaupun jo perabotan nan rusak,” kecek Lisa sambia manambahkan baso salamo maso darurat, usaho dilakukan untuak mamastian kagiatan pandidikan indak baranti. (tan parpatiah)
